SERIKALI KUANZISHA CHOMBO CHA UTAMBUZI NA USAJILI WA BARABARA ZOTE NCHINI

Naibu Waziri wa Ujenzi, Uchukuzi na Mawasiliano, Mhe. Elias John Kwandikwa (kushoto) akisisitiza jambo kwa watendaji  wa Wakala wa Barabara Nchini (TANROADS) Mkoa wa Tanga mara baada ya kukagua barabara ya Turiani- Mziha- Handeni yenye urefu wa kilomita 108 jumatatu Februari 12, 2018. Kulia ni Meneja wa TANROADS Mkoa wa Tanga, Mhandisi Alfred Ndumbaro.

Naibu Waziri wa Ujenzi, Uchukuzi na Mawasiliano, Mhe. Elias John Kwandikwa (kushoto) akisisitiza jambo kwa Viongozi wa Wilaya ya Handeni wakiongozwa na Mkuu wa Wilaya hiyo, Godwin Gondwe (wa pili kushoto) mara baada ya kukagua barabara ya Handeni- Manyara yenye urefu wa kilomita 88 jumatatu Februari 12, 2018.

Naibu Waziri wa Ujenzi, Uchukuzi na Mawasiliano, Mhe. Elias John Kwandikwa (kushoto) akijadiliana jambo na Mkuu wa Wilaya ya Handeni Godwin Gondwe (katikati) na Mkurugenzi Mtendaji wa Halmashauri ya Wilaya ya Korogwe,  William Makufye wakati wa ziara yake ya kukagua miradi ya ujenzi wa barabara Wilayani humo jumatatu Februari 12, 2018.

Na Ismail Ngayonga

 Serikali  imesema ipo mbioni kuanzisha mfumo wa utambuzi na usajili wa barabara zote nchini, hatua inayolenga kuziwezesha barabara zote kujengwa katika viwango vinavyofafana na ubora wa huduma ili kuchochea maendeleo ya kiuchumi kwa wananchi hususani wa maeneo ya vijijini.

Hayo yamesemwa leo Wilayani Handeni Mkoani Tanga na Naibu Waziri wa Ujenzi, Uchukuzi na Mawasiliano, Elias Kwandikwa wakati wa ziara yake ya kukagua miradi ya ujenzi wa barabara katika Wilaya za Handeni, Kilindi na  Korogwe.

Kwandikwa alisema ili kutekeleza adhma hiyo, Serikali imekusudia kuiwezesha Wakala wa Barabara za Mijini na Vijijini (TARURA) kwa kuiongezea uwezo wa vitendea kazi na waatalamu wa kutosha ili kuhakikisha kuwa miradi ya barabara iliyopo katika Halmashauri zote nchini inakuwa na chombo maalum cha usimamizi.

“Ni wajibu wa Watendaji wote kushirikiana katika kusimamia miradi ya barabara, kwa kutoa ushirikiano wa kutosha kwa TARURA ikiwemo kuipata fedha pale inapokwama katika kutekeleza wajibu wake hususani katika maeneo korofi yanayohitaji fedha maalum” alisema Kwandikwa.

Alisema kukamilika kwa miradi ya barabara katika maeneo mengi ya vijijini kutawezesha wananchi kushiriki kikamilifu katika shughuli mbalimbali za kiuchumi ikiwemo uzalishaji na usafirishaji wa mazao na pembejeo na hivyo kuvutia uwekezaji katika miradi mikubwa ya maendeleo.

Aidha Kwandikwa alisema ili kutekeleza vyema majukumu yake, ni wajibu pia wa TARURA kujisogeza karibu zaidi kwa jamii ikiwemo kutoa elimu ya mara kwa mara kwa wananchi na Viongozi mbalimbali katika Mamlaka ya Serikali za mitaa, hatua inayolenga kujenga uelewa wa mamlaka, wajibu na majukumu ya taasisi hiyo.

Aliongeza kuwa asilimia 80 ya uwezeshaji wa uchumi katika maeneo ya vijijini unategemea upatikanaji wa miundombinu ya barabara za uhakika, hivyo ni wajibu wa TARURA kuhakikisha kuwa wananchi wanashiriki kikamilifu katika shughuli za kuinua uchumi pasipo kukabiliwa na changamoto zisizo na ulazima.

Akifafanua zaidi Kwandikwa alisema Serikali ipo tayari wakati wowote kutoa ushirikiano unaohitajika ikiwemo kupokea ushauri, mapendekezo na maoni kuhusu hatua mbalimbali zinazopaswa katika kuboresha na kusimamia miundombinu ya barabara inayosimamiwa na taasisi hiyo.

Kwa upande wake, Mkuu wa Wilaya ya Handeni, Godwin Gondwe alisema Wilaya yake imejipanga kikamilifu katika kuhakikisha kuwa sheria, kanuni na taratibu mbalimbali zinafuatwa katika usimamizi wa miundombinu ya barabara kwa kuwa hatua itasaidia kuleta maendeleo ya haraka kwa wananchi.

“Wilaya imejipanga kikamilifu katika kusimamia sheria ikiwemo kudhibiti mifugo inayovuka kutoka upande mmoja wa barabara kwenda mwingine, kwa kuwa mara nyingi imekuwa ikichangia uharibifu wa miundombinu ya barabara zetu” alisema Gondwe.