TBL GROUP YAENDELEA KUUNGA KAMPENI YA USALAMA BARABARANI YATOA BAJAJI 2

Kamanda Mpinga akionyesha funguo za bajaji alizokabidhiwa.

Afisa Uhusiano wa TBL Group  Amanda Walter akielezea namna TBL inavyoendelea kuunga mkono jitihada za serikali za kutokomeza ajali za barabarani kupitia Kikosi cha Polisi cha Usalama Barabarani.




Kamanda wa Kikosi hicho,Kamishna wa Polisi ,Mohammed Mpinga akifafanua jambo katika hafla iliyofanyika Makao Makuu ya Kikosi  jijini Dar es Salaam.

Katika mkakati wake endelevu wa kampeni za  Usalama barabarani,Kampuni ya TBL Group  imetoa msaada wa Bajaj 2  kwa Jeshi la Polisi Kikosi cha Usalama Barabarani kwa ajili ya kuongeza nguvu za kusimamia usalama barabarani.

 

Bajaj hizo zimekabidhiwa kwa Kamanda wa Kikosi hicho,Kamishna wa Polisi ,Mohammed Mpinga katika hafla iliyofanyika Makao Makuu ya Kikosi  jijini Dar es Salaam.

 

Akiongea kabla ya kupokea msaada huo,Kamanda Mpinga aliishukuru TBL Group kwa msaada  huo ambao alidai kuwa utapunguza adha ya usafiri kwa askari kutoka kikosi chake watakapokuwa wanatekeleza majukumu yao ya kuimarisha usalama barabarani .

 

“Tunawashukuru TBL Group kwa kulivalia njuga suala la usalama kikamilifu bila kuchoka kwa kuwa wamekuwa ni wadau wakubwa wa mapambano ya kutokomeza tatizo la ajali za barabarani na wamekuwa wakiunga mkono kampeni hizi kwa kipindi cha muda mrefu”.Alisema Kamanda Mpinga.

Kwa upande wake Afisa Uhusiano wa Mambo ya Nje wa TBL Group,Amanda Walter,alisema kuwa kampuni ya TBL inaendelea kuunga mkono jitihada za serikali za kutokomeza ajali za barabarani kupitia Kikosi cha Polisi cha Usalama Barabarani.

 

“Tutaendelea kuunga mkono kazi nzuri inayofanywa na serikali kupitia Kikosi cha Usalama Barabarani na wadau wengine kupunguza matukio ya ajali  za barabarani ambazo zimekuwa zikipoteza maisha ya watu wengi na wengine wakibakia kuwa na ulemavu bila kusahau hasara mbalimbali zinazotokea kutokana na ajali”Alisema Amanda.

 

Aliongeza kuwa hivi sasa kampuni hiyo imekuja na mkakati mkubwa wa kuendesha mafunzo ya kuhamasisha jamii Unywaji wa Kistaarabu “Tukiwa kampuni inayotengeneza vinywaji vyenye kilevi tunalo jukumu pia kuhamasisha jamii kutumia vinywaji hivyo vizuri ili utumiaji wake usilete madhara mengine kwenye jamii”

 

TBL imekuwa ikiunga mkono kampeni za usalama barabarani ambapo kwa kipindi cha mwaka huu imekuwa mmoja wa wadhamini wa Wiki ya Nenda kwa Usalama barabarani iliyofanyika kitaifa mkoani Geita ambapo iliwezesha idadi kubwa ya madereva kupima afya zao kupitia huduma ya Zahanati Mwendo pia imekuwa ikiendelea kudhamini kampeni hizo kwenye ngazi za mikoa ikiwemo kudhamini mafunzo ya Usalama barabarani kwa wanafunzi wa shule za msingi.