MADIWANI 6 WASHIKILIWA NA POLISI GEITA KWA MAANDAMANO YA JANA MKOANI GEITA

Kamanda wa Jeshi la Polisi Mkoani Geita Mponjoli Mwabulambo akielezea juu ya hatua ambayo amechukua kwa kuwakamata madiwani sita pamoja na katibu wa UVCCM  Kutokana na kufanya maandamano ambayo yalikuwa ni kinyume na sheria za Nchi mbele ya waandishi wa habari.

Baadhi ya askari pamoja na wafanyakazi wa mgodi huo wakiwa kwenye Bomba ambalo linadaiwa kwa mujibu wa maelezo ya mwenyekiti wa kijiji hicho  kupasuliwa na  Madiwani wa Halmashauri zote mbili wakati wa maandamano ya kushinikiza malipo ya dola milioni 12.65 zinazotokana na malimbikizo ya huduma ya jamii ya mwaka 2004 hadi 2013

Sehemu ya Bomba iliyoharibiwa ikitilili9sha maji kwa kasi kubwa zaidi kutokana na tukio ambalo limetokea siku ya jana kwa madiwani kuandamana wakishinikiza mgodi kuwalipa kiasi cha Dola Milioni 12.65 ambazo ni deni la mwaka 2004 hadi 2013. .

Meneja Mhandamizi wa Maswala ya Jamii Mgodi wa GGM ,Manase Ndoloma akiwa sehemu ya eneo ambalo lilifanyiwa uharibifu wa kupasuliwa kwa bomba ambalo ndio linapeleka maji kwenye chanzo cha maji mgodini hapo.

Shughuli za ukarabati wa Bomba hilo zikiendelea.

Mafundi wakiendelea na shughuli za ukarabati wa Bomba hilo.

PICHA NA JOEL MADUKA

Madiwani 6 wanashikiliwa na Polisi mkoani Geita baada ya kufanya maandamano kinyume cha sheria na kusababisha uharibifu wa Bomba la Maji la kutoka Nungwe kwenda kwenye Mgodi wa Dhahau wa GGM.

Kamanda wa Polisi mkoani Geita Bw Mponjoli Mwabulambo amesema walichofanya madiwani hao jana hakikubaliki kisheria na kwamba hawakufuata utaratibu wa kufanya maandaman yao na kwamba wanaendelea na msako wa kuwabahini wale wote ambao wamefanya kitendo cha kuandamana na kusababisha baadhi ya kazi kusimama siku ya jana.

Amesema miongoni mwa wanaoshikiliwa  ni pamoja na Katibu wa Umoja wa Vijana wa CCM UVCCM  wilaya ya Geita kwa tuhuma za kushiriki maandamano na kufanya uharibifu huo.

“Kwa mtu wa kawaida sidhani kama alipendezwa na kitendo hicho tuache habari ya kuremba na kupepesa macho lile tukio sidhani kama ni kitendo kizuri, ni kosa ambalo walilitenda na kwamba tunawashikilia madiwani sita akiwemo katibu wa umoja wa vijana wa chama cha mapinduzi wilaya ya Geita na hicho hakikuwa kizuri lakini pia kukimbia kwao niseme sio suluhisho tutawakamata”Alisema Mponjoli.

Meneja Mwandamizi wa Mahusiano ya Jamii kwenye mgodi wa GGM Bw Manase Ndoloma amesema taarifa za kupasuliwa kwa bomba hilo linalotoa maji safi  kutoka ziwa Victoria kupitia kwenye kijiji cha Nungwe hadi  kituo cha usambazaji maji kwenye Bwawa la Nyakanga walizipata kwa wananchi na ameahidi kuendelea kushirikiana na wananchi katika kuleta maendeleo kwenye maeneo yao na kwamba mgodi haujaathirika kwa kutobolewa kwa bomba hilo.

“Tungependa kufanya shughuli zetu za kutekeleza miradi ya kuisaidia jamii ya Geita kwa hali ya usalama lakini pia kwa usalama wa wafanyakazi wetu mgodi wa dhahabu wa Geita utaendelea kushirikiana kwa ukaribu na serikali ya jamhuri ya muungano wa Tanzania pamoja na jamii inayozunguka eneo la mgodi ili kuharakisha urejeshaji wa maji pamoja na amani kwa ujumla ndani ya mji wa Geita”Alisema Manase.

Mwenyekiti wa Kijiji cha Nungwe Bw  Revocatus Masatu amesema aliwaona watu kutoka halmashauri na magari ya serikali na hakuwa na taarifa yoyote kuhusu kupasuliwa kwa bomba hilo kwani alijua ni taratibu kwa halmashauri kutembelea vijiji vyake.

IMEANDALIWA NA MADUKA ONLINE .