WAFANYABIASHARA WAIOMBA SERIKALI KUINGILIA KATI UPANUZI WA SOKO,GEITA

Eneo la soko la Nyawilimelwa ambalo linalalamikiwa na wanakijiji pamoja na wafanyabiashara kutokana na kutokuwa na mpangilio mzuri ndani ya  soko hilo.

Diwani wa Kata Nyawilimilwa Bw Method  Mtakulwatila,akielezea namna ambavyo anashughulikia suala la ujenzi wa Soko hilo wakati wa kikao ambacho kiliitishwa na Jumuiya ya vijana wa chama cha mapinduzi(UVCCM) kata hiyo ambacho kilikuwa na lengo la kuangalia yale ambayo yametekelezwa na ambayo yanaendelea kufanyiwa kazi hadi sasa huku wakigusia changamoto iliyopo ya soko la Nyawilimilwa.

Na Joel Maduka,Geita..

Wafanyabiashara kwenye Soko la Nyawilimilwa Kijiji cha Tinaji wilayani Geita, wameiomba serikali kuwaandalia mazingira ya soko jingine litakalosaidia kupunguza mlundikano kwenye soko hilo.

Wafanyabiashara hao wamesema kuwepo kwa soko moja kijijini hapo kumesababisha mlundikano huku baadhi ya biashara za vyakula na nafaka zikiwekwa chini jambo linalohatarisha afya za walaji.

Kutokana na hali hiyo, Jumuiya ya umoja wa vijana wa Chama cha mapinduzi, UVCCM kata ya Nyawilimilwa imekutana na kujadili mustakabali tatizo hilo  ambapo Mwekiti wa jumuiya hiyo Hamis Lwezaura amemtaka  diwani wa kata hiyo kuona uwezekano wa kuanza ujenzi wa soko jingine ambalo litaweza kuwahudumia wananchi wengi zaidi kwenye maeneo hayo.

Mwenyekiti wa kijiji cha Tinaji Bw  Majuto Maliyatabu alisema wanaendelea na majadiliano kutatua tatizo hilo na kwamba eneo ambalo walikuwa wamepanga kupeleka soko la samaki limebainika kuwa na mgogoro baina ya wanakijiji na Serikali hivyo wanaendelea kumsubilia mkuu wa wilaya ya Geita kwaajili ya kufika kijijini hapo aweze kutatua tatizo lililopo.

Diwani wa kata hiyo Bw Method  Mtakulwatila alisema amekwisha wasilisha  ombi kwa Halmashauri ya wilaya kuomba ujenzi wa soko hilo na kwamba kwa sasa wanasubiri fedha zitakazosaidia ujenzi huo zitoke ndani ya halmashauri .