AGPAHI YAMWAGIWA SIFA DHIDI YA MAPAMBANO YA VVU WILAYANI CHATO

Muuguzi mkuu kitengo cha tiba na matunzo(CTC) hospitali ya wilaya ya Chato,Zaina Mussa akitoa maelezo mbele ya waandishi wa habari kwenye chumba cha kutolea dawa.

Bw Paul Kanyange,mkazi wa chato akielezea namna ambavyo amekuwa akitumia dawa za kufubaza virusi vya Ukimwi mbele ya waandishi wa habari. 

Muuguzi mkuu kitengo cha tiba na matunzo(CTC) hospitali ya wilaya ya Chato,Zaina Mussa akiwaelezea waandishi wa habari juu ya namna ambavyo wameendelea kutoa huduma za afya kwenye hospitali hiyo kwa watu ambao wanaishi na maambukizi ya Virusi Vya Ukimwi(VVU).

Baadhi ya wadau na wahudumu wa sekta ya afya Wilayani Chato wakisikiliza maelezo ambayo yalikuwa yanatolewa na Muuguzi mkuu kitengo cha tiba na matuzo(CTC) hospitali ya wilaya ya Chato,Zaina Mussa.

Baadhi ya wadau na wahudumu wa sekta ya afya Wilayani Chato wakisikiliza maelezo ambayo yalikuwa yanatolewa na Muuguzi mkuu kitengo cha tiba na matuzo(CTC) hospitali ya wilaya ya Chato,Zaina Mussa.

Mganga mkuu wa wilaya ya Chato,Atnas Ngambakubi akizungumza na waandishi wa habari namna ambavyo Wilaya hiyo umeendelea kupambana dhidi ya maambukizi ya virusi vya Ukimwi kwa kushirikiana na shirika la AGPAHI.

Waandishi wa habari wakiwa kwenye kikao na Mganga mkuu wa wilaya ya Chato,Atnas Ngambakubi .

Muuguzi mkuu kitengo cha tiba na matuzo(CTC) hospitali ya wilaya ya Chato,Zaina Mussa akionesha eneo ambalo linatumika kutunza kumbukumbu kwa waandishi wa habari.

Na,Joel Maduka,Chato.

Uongozi wa Hospitali ya wilaya ya Chato mkoani Geita , wamelipongeza Shirika  lisilo la kiserikali la Ariel Glaser Pediatric AIDS  Healthcare Initiative (AGPAHI) linalojihusisha na mapambano dhidi ya Virusi Vya Ukimwi (VVU) na UKIMWI kutokana na kutekeleza miradi  mbali mbali ikiwa ni pamoja na kuwajengea uwezo watumishi ili waweze kutoa huduma bora kwa wateja kutokana na mafunzo mbali mbali ambayo yanatolewa.

Akizungumza na waandishi wa habari  Mganga mkuu wa wilaya ya Chato,Atnas Ngambakubi, alisema shirika la AGPAHI limekuwa na misaada mikubwa kwenye  vituo vya tiba na matunzo(CTC) ikiwa ni pamoja na kuendelea kutoa semina kwa watumishi ambazo zimeendelea kuwajengea uwezo wa utendaji kazi wa kila siku.

“AGPAHI wamekuwa na msaada mkubwa zaidi ya mapambano ya maambukizi ya Virusi vya Ukimwi ikiwa ni pamoja na kutupatia mashine ya kupima  wingi wa virusi vya Ukimwi kwa wanaotumiwa dawa, lakini pamoja na kwamba tuna mashine tuna sampo ambazo tumekuwa tunazisafirisha kupeleka Bugando na gharama zote zinalipiwa na AGPAHI”. Alisema Dkt Ngambakubi.

Ameendelea  shirika hilo limesaidia kwa kiasi kikubwa kuboresha miundo mbinu kwenye baadhi ya vituo vya afya  kumi na tatu (13) na kwenye maeneo ya zahanati, maeneo ya kutolea dawa pia wameweza kuyaboresha.

Pia alisema waanaamini kuwa fedha ambazo zinatolewa na shirika hilo ni za muhimu  kwani wilaya bado inauhitaji mkubwa wa ufadhili huo ,pia alisisitiza  endapo  wafadhili wakasitisha ufadhili huu wananchi watakosa huduma muhimu sana za afya, kwa sasa wanajitahidi kuendelea kujiimarisha na kutenga kiasi cha kutosha kwenye bajeti ya wilaya.

Aidha kwa upande wake Dkt.Zaina Mussa alisema katika hospitali ya wilaya ya Chato, wamekuwa wakikutana na changamoto nyingi ikiwa ni pamoja na wateja kutokuja kwenye matibabu kwa maana ya kufuatilia dawa hali ambayo inabidi watu anayeishi na Virusi vya Ukimwi (MVIU) mshauri  kuwafatilia kwa ukaribu ili kuweza kuwarudisha kwenye dawa .

“Unakuta  una watoro wa dawa tisini na tano kwa hiyo MVIU mshauri anawafuatilia kwa kuwapigia simu ili waweze kuja kwa ajili ya kupata dawa.Wateja wengine wameendelea kuwa na tatizo la kuendelea kujinyanyapaa mwenyewe” Alisema Zaina.

Moja kati ya watu ambao wanaishi na maambukizi ya Virusi vya Ukimwi ,Bw Paul Kanyange alisema kwa sasa wameendelea kupata huduma nzuri na pia wanapatiwa madawa kwa haraka zaidi ambapo ni tofauti na zamani wakati shirika hilo likiwa bado alijaanza kufadhili baadhi ya huduma.

“Kwa kweli tunalishukuru sana Shirika la AGPAHI kwa kutuletea huduma hii ya madawa  maana imetusaidiakwa kiasi kikubwa kupata dawa kwa urahisi zaidi  lakini pia kuchukua tahadhari ya kuhakikisha tunaepukana na maambukizi mapya",alisema Kanyange.

AGPAHI ni shirika la kitanzania lisilo la kiserikali linajishughulisha na programu za kutokomeza maambukizi ya Virusi vya Ukimwi (VVU) na Ukimwi, kuzuia maambukizi mapya ya VVU kwa watoto, matunzo na huduma za matibabu kwa watu wanaoishi na VVU nchini Tanzania.

Kwa kushirikiana na Serikali ya Tanzania kupitia Wizara ya Afya, Maendeleo ya Jamii, Jinsia, Wazee na Watoto, Ofisi ya Rais Tawala za Mikoa na Serikali za Mitaa na Wahisani, shirika limekuwa likiunga mkono utoaji wa huduma za VVU katika mifumo iliyopo.

AGPAHI imejikita katika kutoa msaada wa huduma zenye ubora wa hali ya juu na kuhakikisha jitihada za kufikia lengo la pamoja la kutokomeza Maambukizi ya VVU kwa watoto linafikiwa.Shirika linafanyakazi katika mikoa ya Tanga, Mwanza, Geita, Mara, Shinyanga, Simiyu.