MLEMAVU ADHURUMIWA NA TAJIRI WA MADINI GEITA

Kamuli Shilinde,ambaye ni mlemavu wa miguu akiomba msaada kwa mkuu wa wilaya ya Geita kupatiwa malipo yake kutokana na kazi ambayo alikuwa akifanya ya kulinda kwenye mgodi mdogo wa Gambi uliopo kwenye kijiji na kata ya Rwamgasa.

Mkuu wa wilaya ya Geita,Mwl Herman Kapufi akisisitiza juu ya kutokukubaliana na baadhi ya matajiri kuendelea kuwaonea wasio na uwezo wa kifedha.

Mtu mwenye  ulemavu  wa miguu, Kamuli Shilinde(30) ambaye ni  mkazi wa kijiji na kata ya Rwamgasa Wilayani na Mkoani Geita amemuomba Mkuu wa Wilaya hiyo Mwl, Heriman Kapufi kumsaidia kulipwa malipo yake kiasi cha shilingi laki tano(500,000) alizodhurumiwa na mwekezaji  wa Madini mzawa Emannuli Gambi ikiwa ni malipo baada ya kuajiriwa.

Aidha Shilinde  ametoa kilio chake hicho mbele ya mkuu huyo kwenye mkutano wa hadhara uliofanyika katika uwanja wa kituo cha polisi uliokuwa na lengo la kuhimiza  wananchi kuchangia maendeleo na kusikiliza kero zao .

Pia mtu huyo mwenye ulemavu  ameendelea kusema kuwa tajiri huyo ambaye ni mkazi wa Geita mjini alimuajiri  kuwasachi wachimbaji wadogo wanaotoka kwenye maduara yake ili wasiweze kutoka na dhahabu na kutokomea nazo.

“Mkuu wa Wilaya mimi nashukuru sana ujio wako kwenye kata yetu ya Rwamgasa mimi ni mlemavu kama unavyoniona lakini ni muhanga niliyedhurumiwa pesa zangu na tajiri wa madini anaitwa Emannuel Gambi  kila ninapomtafuta natishiwa kufungwa naomba msaada wako anilipe pesa zangu ninazomdai” alisema  Shilinde

“Nikuwa nafanya kazi ngumu sana mkuu wangu jua na mvua vilikuwa vyangu na kibaya zaidi nilikosana na wachimbaji niliokuwa nikiwasachi mifukoni mwao nilifanya kazi hiyo kwa uadilifu na uaminifu mkubwa sana  bira yeye kupata shoti hata kidogo lakini alimbikiza pesa zangu na nilipoanza kudai nilikuwa natishiwa kufungwa naomba msaada mkuu wangu”aliongeza Shilinde.

Kwa upande wake Mkuu wa Wilaya hiyo  Mwl Herman Kapufi amehaidi kulifuatilia swala hilo kwa tajiri huyo na kwamba hatokubali kuona wananchi kwenye Wilaya yake  wadhurumiwa na watu wenye fedha na kwamba kama kuna wawekezaji wanawaza kuja kuwekeza na kuwadhurumu wezao kwa kutumia fedha zao watafute pa kwenda huku akimtaka mlemvu huyo kumpigia simu siku ya jumatatu.

“Nimepokea malalamiko yako ndugu yangu lakini nakuahidi kulifatilia mara moja na utalipwa fedha zako mara moja kwani hakuna mtu yeyote aliyeko juu ya sheria nitakuachia fedha kwa ajili ya kunipigia simu yangu ya mkononi na huyo tajiri nitamchukulia hatua za kisheria”alisema Kapufi

Alipotafutwa tajiri huyo kwa njia ya simu yake ya mkononi alimtaka mwandishi wa habari hii kuandika chochote alichokisikia kutoka kwa mlemavu huyo huku akisema yeye hawezi kudaiwa na mtu kama huyo na kwamba hawezi kutoa ajira kwa mtu mlemvu wa viungo kisha kukata simu na kuzima.

“Andika chochote ama lolote ulilosikia akisema yeye  mlemavu huyo kwenye mkutano huo  wa hadhara mimi kwa uwezo nilionao siwezi kutoa ajira kwa mlemvu na sijawahi kudaiwa na mlemvu kwanza mimi simjui”alisema tajiri huyo.