AGPAHI YAMALIZA WARSHA YA SIKU TATU KWA KUWAJENGEA UWEZO WAVIU WASHAURI

WAVIU washauri wakiwa kwenye picha ya pamoja baada ya kumaliza Warsha ya siku tatu Mkoani Geita.

Bi,Imelda Assey akikabidhiwa cheti cha ushiriki na  Bi,Amida Yindi  ambaye ni mratibu wa VVU na UKIMWI  ngazi ya jamii kwenye halmashauri ya wilaya ya Geita.

Afisa Miradi Huduma Unganishi kwa jamii kutoka Shirika la AGPAHI, Richard Kambarangwe akielezea juu namna ya kutumia kitabu cha usajili wa wateja katika CTC wakati walipotembelea kwenye kituo cha tiba na matunzo (CTC)  kilichopo Hospitali ya Rufaa ya mkoa wa Geita.

Afisa Miradi Huduma Unganishi kwa jamii kutoka Shirika la AGPAHI, Richard Kambarangwe ,akimkaribisha Mratibu wa Ukimwi mkoa wa Geita,Dk Joseph Odero wakati wa warsha ambayo ilikuwa inafanyika kwenye ukumbi wa hotel ya Alphendo mjini Geita.

Mratibu wa Ukimwi mkoa wa Geita,Dk Joseph Odero akizungumza na WAVIU washauri wakati wa warsha ambapo aliwasisitiza kutumia vyema mafunzo ambay0 wamepatiwa.

WAVIU washauri wakiingia  katika hospitali ya Rufaa ya mkoa wa Geita kwa lengo la   kutembelea CTC hiyo kujifunza namna huduma zinavyotolewa katika kituo hicho cha tiba na matunzo.

Hapa ni washiriki wa warsha hiyo wakiwa katika kitengo cha CTC  katika hospitali ya Rufaa ya mkoa wa Geita.

Muuguzi katika ya hospitali ya Rufaa ya mkoa wa Geita  Minza Elias John akionesha  namna ambavyo wamekuwa wakiweka taarifa za mteja ambaye anafika kwenye kituo hicho.

Mhudumu wa kwenye chumba cha utunzaji wa Takwimu za Ukimwi Bi,Sayuni John akitoa maelezo kwa WAVIU washauri ambao walikuwa wameenda kwaajili ya kujifunza namna ambavyo wanatunza taarifa.

Na,Joel Maduka,Geita

Shirika lisilo la kiserikali Ariel Glaser Pediatric AIDS Healthcare Initiative (AGPAHI) linalojihusisha na mapambano dhidi ya Virusi Vya Ukimwi (VVU) na UKIMWI limemaliza  warsha  ya siku tatu kwa WAVIU Washauri 46 kutoka kwenye halmashauri nne za  mkoa wa Geita.

WAVIU washauri ni watu wanaoishi na maambukizi ya virusi vya Ukimwi na wamejiweka wazi na huru kuwashauri watu wanaoishi na VVU katika nyanja mbalimbali ikiwemo ufuasi mzuri wa dawa, kutoa ushauri nasaha kwa wenzao, kujitolea kufuatilia na kufundisha wenzao kwa njia ya ushuhuda wa maisha sambamba na kuhamasisha WAVIU wenzao kujiunga katika vikundi ili kusaidiana na kupunguza unyanyapaa.

Akizungumza katika warsha hiyo, Mratibu wa kuzibiti Ukimwi Mkoani Geita, Dr Joseph Odero aliwasisitiza WAVIU Washauri kutumia uchache wao kuleta chachu kwenye jamii ambazo wamekuwa wakishughulika kufanya kazi za ushauri kwa watu ambao wanaishi na maambukizi ya VVU.

“Mwaka 2017 kwa mkoa wa Geita asilimia kumi na nne (14%) ya watu walikua wanaishi na maambukizi ya VVU na themanini na mbili (82%) walikuwa ni wazima sasa tumeona kumbe kwa kutumia dawa mambo yanawezekana. Lakini pia tumeona wengine wameendelea kwenda kwa waganga wa jadi hawataki kukubali kwamba wanaishi na VVU hali hii nyie kama WAVIU washauri mnajukumu la kuhakikisha manawasaidia watu wenye hali hiyo”, alisema Dr. Odero.

Odero ameendelea kusisitiza uzoefu ambao wameupata kwa siku tatu kutumia vyema mafunzo hayo na yaonekane kuleta tija kwenye jamii ambazo wanatokea kwani kufanya hivyo watakuwa wamewasaidia watu ambao wanaishi na maambukizi ya VVU kujiona kuwa wanathamani kwenye jamii.

Afisa Miradi Huduma Unganishi kwa jamii kutoka Shirika la AGPAHI, Richard Kambarangwe alisema WAVIU washauri ambao wanahudumiwa na shirika hilo wapo mia moja therathini na sita (136)ambao shughuli zao ni kutoa ushauri na kuwarudisha wale watu ambao wamekimbia kutumia dawa za kufubaza makali ya VVU .