WANAWAKE WACHIMBISHWA KABURI WAKITUHUMIWA NI WASHIRIKINA GEITA

Baadhi ya wanawake wa mtaa wa Buyegule wakichimba Kaburi kutokana na wanaume kugoma kufanya shughuli hiyo.

Baadhi ya wanaume wakiwa wamekaa wakisubilia taratibu za mazishi.



NA,MADUKA ONLINE ,GEITA

Wanaume wa mtaa wa  Buyegule  kata ya Mtakuja Halmashauri ya Mji wa Geita wamelazimisha Wanawake kuchimba kaburi la Marehemu Mkangiko Vigume kwa madai Marehemu alifariki katika mazingira ya kutatanisha na kudaiwa Wanawake wanahusika.

Imezoeleka kuwa kwenye jamii zetu wanaume ndio wanahusika wakuu wa  kufanya shughuli za uchimbaji wa kaburi na kubeba mwili wa marehemu lakini kwenye mtaa huo hali imekuwa ni tofauti kutokana na madai ya wanaume kulalamika kuwa wameendelea kupoteza maisha kwenye mazingira ya kutatanisha na kujikuta wakiendelea kuisha na kuelezwa  kufanya hivyo ni adhabu tosha kwa wanawake ambao wamekuwa na tabia za kishirikina.

Wakizungumza kwa vipindi Tofauti na mtandao huu  kwenye familia ya mzee Kangeko Vigume ambaye amefariki kutokana na kuugua ghafla wamesema kuwa tukio hilo la kufariki mwanaume sio la kwanza na kwamba hadi sasa kuna wanaume 7 wamepoteza maisha kwenye mazingira ya kutatanisha .

“Kiukweli sisi tumeumia sana kutokana na matukioa haya kuendelea kujirudia mara kwa mara kwenye mtaa wetu sisi wanaume ndio ambao tumekuwa tukifa jambo la kushangaza wao awafi wakifa ni magonjwa hila sisi ni ghafla”Alisema Mussa John.

“Jambo la kusikitisha watu ambao tunawazika wamekuwa wakirudi na kutungongea hodi na uku sisi tunajua tumewazika hili ndilo linatushitua zaidi sisi kama wanaume wa mtaa huu”Alisema Mzee Kahema Msabira.

kwa upande wao wanawake  wamesema kuwa kitendo ambacho kimefanywa na wanaume wa mtaa huo sio kitendo kizuri kwani walitishwa na kuambiwa kuwa wasipofanya shughuli ya kuchimba kaburi wataadhibiwa kwa kuchapwa viboko kila mmoja.

“Sikutaka kufanya shughuli hii ya kuchimba kaburi lakini jambo la kusikitisha nimelazimishwa tu sisi wanawake tunaonewa sana kwani akuna wanaume wachawi”Alisema Bi,Frola Nyanda.

Mwenyekiti wa mtaa huo,Bw,Andrew Barnabas amesema alishindwa kuzuia wananchi kufanya kitendo hicho kutokana na wengi wao kutokusikiliza hoja yake na kuamua kujichukulia maamuzi wao wenyewe.

Mkuu wa wilaya ya Geita,Mwl Herman Kapufi amesema watakwenda kwenye mtaa huo na kukutana na wananchi waweze kuwaelimisha ikiwa ni pamoja na kuwachukulia hatua watu ambao wamehusika kuhamasisha suala hilo.

Pamoja  na wanaume kuzika wamewataka wanawake hao kujua kuwa hilo ni onyo na kwamba ikitokea Mwanaume mwingine kufariki kwenye mazingira ya utata hawatashiriki kwa shughuli yoyote ile ya kuzika.