BAVICHA GEITA YALAANI KITENDO CHA MWENYEKITI KUHUSISHWA NA MATUMIZI YA MADAWA YA KULEVYA.

Mwenyekiti wa BAVICHA Mkoani Geita,Neema Chozaire akizungumza wakati wa kikao cha mpango kazi kilichofanyika mjini Geita.

Wajumbe wakifatilia kwa makini tamko na msimamo wa Baraza la vijana wa chama cha Demokrasia na Maendeleo Mkoani Geita.

Katibu wa BAVICHA Wilayani Geita na Kaimu katibu wa Umoja huo Mkoa wa Geita,Nguru Bright akielezea namna ambavyo wamekuwa wakisikitishwa na maamuzi ambayo yamekuwa yakitolewa na baadhi ya wakuu wa Mikoa na wa Wilaya hapa nchini.

Mwenyekiti wa BAVICHA Jimbo la Geita Mjini Deogratius Shinyanga akifafanua juu ya vifungu vya sheria  juu ya uwamuzi wa Mkuu wa Mkoa  wa Dar es salaam ,kujitokeza hadharani na kumtangaza kiongozi wao  kwenye vyombo vya habari.

Lenard Ntobola ambaye ni mwenyekiti wa BAVICHA Wilaya ya Mbongwe akisisitiza msimamo wa chama hicho.

Mwenyekiti wa BAVICHA Mkoani Geita,Neema Chozaire,akielezea juu ya sheria kuchukuliwa kwa kiongozi huyo.

Baraza la vijana wa Chama cha Demokrasia na, Maendeleo(BAVICHA)Mkoani Geita,limelaani vikali kitendo cha Mkuu wa Mkoa wa Dar es salaam Paul Makonda kumtuhumu mwenyekiti wa chama hicho ngazi ya Taifa Freeman Mbowe  kuwa anajihusisha na matumizi ya madawa ya kulevya na uuzaji jambo ambalo wamesema kuwa ni ukiukwaji wa misingi ya sheria kwa kumtangaza kiongozi wao kwenye vyombo vya habari na kwenye hadhara ya watu.

Hayo yalisemwa  na Mwenyekiti wa BAVICHA Mkoani Geita,Neema Chozaire wakati wa kikao cha mpango kazi kilichofanyika mjini Geita.

Bi,Chozaire alisema kuwa kitendo hicho ambacho kimefanywa na mkuu wa mkoa wa Dar es salaam ni uzalilishaji mkubwa kwa kiongozi wao kwani hakuna ushahidi ambao unamwonesha kuwa ni mtumiaji na muuzaji wa madawa ya kulevya hivyo kitendo cha kumtangaza hadharani kiongozi wao ni ukiukwaji wa katiba ya Jamhuri ya Muungano wa Tanzania.

“Tunawaomba watanzania wapuuze vikali kwani hii ni siasa inachezwa na kuna kauli zilishawai kutokea kwamba watahakikisha wanauwa vyama pinzani na ndio maana RC Makonda hakuona hatari kuwataja viongozi kuwa ni watumiaji wa madawa ya kulevya kweli imetuuma sana na pia tumesikitishwa sana na kitendo hiki ambacho kimefanywa na Makonda”Alisema Chozaire.

Mwenyekiti wa Bavicha Jimbo la Geita Mjini,Deogratias Shinyanga,alielezea kuwa kesi ambayo ipo mahakamani  sio ya kwamba amepandishwa kwa sababu anajihusisha na madawa ya kulevya kwani kiongozi wao ameenda kuomba tafsiri ya kikatiba juu ya mamlaka ambayo anayo mkuu wa mkoa kuitisha watu na kumtangaza kiongozi huyo.

Aidha kwa upande wake Katibu wa Bavicha Wilaya ya Geita Nguru Bright,alisema  kuwa kitendo cha kutangazwa kwa mtuhumiwa kabla ya kukamatwa na polisi na kufikishwa mahakamani ni sawa na kuingilia mamlaka ya jeshi la polisi na mahakama kwani kumtangaza mtu kesi ingekuwa imesomwa  na kubainishwa kama ni kweli mtuhumiwa anahusika na madawa ya kulevya.

Hatua ya BAVICHA imekuja mara baada ya kiongozi na mwenyekiti wa chama hicho ngazi ya Taifa kuhusishwa na matumizi  pamoja na uuzaji wa madawa ya kulevya.

IMEANDALIWA NA MADUKA ONLINE.