KILICHOTOKEA GEITA NI AIBU KWA JESHI LA POLISI

NA EDWIN SOKO 

0754551306

Naamini  kuna  umuhimu  mkubwa wa  ushirikiano   baina  ya  Jeshi la Polisi  na Waandishi wa Habari  Nchini, nasema hivyo  kwa kuwa   kama  Jeshi la Polisi  litaweza kuvitumi vyema  vyombo vya  habari  linaweza  kurahisisha  kazi  zake  kwa kutumia mahusiano  yaliyopo   baina yake na  vyombo vya  habari.

Vyombo vya  habari  vimekuwa  na  vyanzo  vingi  vya  taarifa  na  kizuri zaidi   amii  inaweza kuviamini zaidi  vyombo vya  habari kuliko muhimili mwingine  wowote, kwa misingi hiyo  hiyo wapo  Waandishi wenye  ujuzi  wanaofanya uchokonozi  kwenye  mazingira  ya  siri (undercover  reportage). Kwa misingi hiyo  Jeshi la Polisi lilihitaji zaidi  mahusiano  na vyombo vya  habari  kuliko uhasama.

Kitendo  kilichotokea  Mkoani Geita  kwa Jeshi la Polisi  kuwashambulia  waandishi   ni kitendo cha fedhea  kisichostahili  kufumbiwa  macho, dhana  kuu  ya  kuanzishwa  kwa jeshi   la  polisi  ni kuwalinda  raia na mali  zao.  Je hilo  la  kuwapiga  waandishi  ni sahihi?

Nina  imani  kwa  hili  la  Geita kwa kuweka mbele  misingi  ya  utawala bora (Good  Governance) Kamanda wa Polisi  wa Mkoa wa Geita   Mponjoli Mwabulambo   awajibike   na  kuchukua  hatua  dhidi ya  askari waliohusika kuwadhalilisha na kuwapiga  Waandishi  Joel  Maduka  wa  kituo cha Radio  storm  Fm na  Valence Robert,  mwakilishi wa kituo cha channel  Ten.

Kuna mstari  wa mfananisho wa kutegemeana   baina  ya  Vyombo vya  habari  na Jeshi  la Polisi, Mwanafalsafa  mmoja wa kirusi  alisema kuwa, mfanano huo ni sawa na samaki  na maji.

Bila  shaka  Inspector  General  wa Polisi  Ernest  Mangu  ana  wajibu wa kuandaa  mpango  mkakati wa kujenga  maridhiano  baina  ya  Jeshi hilo  na Vyombo vya  Habari ili  kuendeleza  amani, kwa misingi ya  kuheshimu  katiba ya  Nchi na mikataba  mbalimbali  ya kikanda  na  kidunia

Wajibu mwingine ni  kwa upande wa  Vyombo  vya  Habari, taasisi  zake  na wadau wa habari kutafuta  mbadala wa kisayansi  wa kumaliza  tatizo  hili (scientific   possible  solution)  ili  kuimarisha  mahusiano  na Jeshi la Polisi  na  kuwaweka  waandishi  kwenye  hatua  nzuri  za kiusalama.

Mwisho  naamini kuwa, Jeshi  la  polisi  na vyombo  vya  habari  kila  mmoja ana wajibu kwenye  jamii, ni kosa  kwa upande  mmoja  kujiona  ni zaidi ya  mwenzako