WAFANYABIASHARA SOKO LA NYANKUMBU WALALAMIKIA KUJAA KWA CHOO CHAO

Sehemu ya mfuniko wa choo ikiwa imejaa na kusababisha maji machafu kutoka nje kwenye Soko la Nyankumbu Mjini Geita.

Maji machafu yakitililika kutoka kwenye chemba ya choo hicho.

Diwani wa Kata ya Nyankumbu Michael Kapaya akielezea juu ya jitihada za kukitapisha choo hicho kutokana na kujaa.

Kaimu Mkurugenzi wa Halmashauri ya Mji wa Geita,Bw Majagi Maige akizungumzia juu ya hatua ambazo wamekwisha kuzichukua za kukitapisha choo cha Soko la Nyankumbu.

Wafanyabiashara kwenye soko la Nyankumbu mjini Geita wamelalamikia kero ya kujaa kwa choo kwenye soko hilo.

Wakizungumza na mtandao huu wafanyabiashara hao wamesema hali hiyo inasababisha maji taka kuchuruzikia kwenye maeneo wanayofanyia shughuli zao.

Baadhi ya wafanyabiashara wamesema licha ya kuwa wanalipa Shilingi mia mbili ( 200 )kwa ajili ya kupata huduma hiyo lakini bado mamlaka husika imekitelekeza choo hicho kutokana na kujaa kwa muda mrefu hali inayoweza kusababisha magonjwa ya mlipuko.

“Tupo hatarini kufa kutokana na magonjwa ya mlipuko kutokana na hali hii ya choo kwani maji haya yamekuwa yakitawanyika na kuja kwenye maeneo yetu ya biashara husuani kwenye kipindi cha mvua ambazo zinaendelea kunyesha hali ni mbaya sana tunaomba mamlaka itusaidie jamani maana tunaangamia na hali hii yani tunakuwa kama sio wafanyabiashara wa soko la mjini halmashauri kuna gari ni kitendo cha kusema tu mkurgenzi gari lije linyonye hiki kinyesi tunaomba waandishi mtusaidie”Alisema Bw,Kasiusi  Michael.

Baadhi ya wananchi wamesema wanakerwa kwa kujaa kwa choo hicho na kuitaka Halmashauri ya Mji wa Geita kulishughulikia tatizo hilo.

“Hali hii ni mbovu tunapopita hapa pananuka na maji haya yanaelekea sehemu ambapo wafanyabiashara wa mboga mboga wanapooshea lakini jambo la kushangaza ingekuwa ni sisi wananchi tunachoo cha namna hiyo tungekamatwa badala ya halmashauri kuonesha mfano yenyewe ndio imekuwa chanzo cha kuachaniza mazingira kama haya ya choo kuwa machafu”Alisema Bi Sophia Madinda.

Diwani wa Kata ya Nyankumbu Bw Michael Kapaya amesema watachimba shimo jingine la choo pembeni lakini kutokana na mvua zinazoendelea kunyesha imeshindikana hadi zitakapopungua.

Kaimu Mkurugenzi wa halmashauri ya Mji Bw Majagi Maiga amesema wamechelewa kupata taarifa lakini tayari wamepeleka gari kwa ajili ya kunyonya maji taka.